ليه لازم نحشد لمرسي !؟

انا مش بس هنتخب مرسي .. أنا هحشد له في الشارع .. بقالي يومين بتكلم مع كل الناس اللي اقدر اوصلهم .. ناس اعرفها وناس معرفهاش .. اتشتمت واتخونت واتقال عليا اني اخوان مع اني مبركعهاش.

لازم نحشد لمرسي مش حب فيه ولا في الاخوان انما كرها في شفيق و في الحزب الوطني ودولة الفساد اللي بتسانده بكل طاقتها .. انها معركة النظام الأخيرة .. أكون او لا أكون.

ناس كتير من اللي انتخبوا ابو الفتوح و صباحي مش هينزلوا انتخابات الاعادة .. وفي منهم هينتخبوا شفيق بالعند في الاخوان وخوفا من الدولة الاسلامية.

شفيق هياخد اصوات عمرو موسى (تقريبا 2 مليون صوت) وشوية من أصوات حمدين (الله اعلم نسبتهم هتكون كام) غير الناس اللي كارهة الاخوان بالاضافة لاصواته الاصلية يعني اجمالي تقريبا نقدر نتوقع انه هياخد 10 مليون صوت.
مرسي بقى مالوش غير اصواته و اصوات محمد سليم العوا (الاف) يعني اجمالي 7 مليون.

لازم مرسي و الاخوان يطمنوا الناس ويقدموا ضمانات حقيقية للناس اللي انتخبت حمدين وابو الفتوح والا هيخسروا الانتخابات خسارة فادحة .. وهيسلموا البلد على طبق ذهب للحزب الوطني.

الناس اللي خايفة من الاخوان وعندهم اسلاموفوبيا بيقولوا ان الاخوان كده هيكوشوا على كل السلطات وهيبقوا حزب وطني جديد .. منطق غريب انك تخاف من حزب وطني جديد فترجع القديم .. الحزب الوطني الجديد اللي بتقول عليه مش هيلحق يسيطر على البلد .. لاحظ ان الاخوان شعبيتهم قلت في الشارع .. شوف كام واحد انتخب قوايمهم في مجلس الشعب وكام واحد انتخب مرشحهم في انتخابات الرئاسة .. الاخوان مش هيلحقوا يبقوا حزب وطني جديد لانهم هيتقلشوا بسرعة.

الناس اللي خايفة من الاخوان وانهم مش بيوفوا بوعودهم  وبيلتفوا حول مطالب الثورة .. احب اقولك ان ده لو حصل هتلاقي مش اقل من 8 مليون واحد في التحرير ضدهم بالاضافة للناس اللي ادت شفيق .. الاخوان قدامهم شغل كتير يعملوه عشان يكسبوا الناس في صفهم ودي نقطة مهمة ممكن جدا نستغلها و نضغط بيها عليهم لتحقيق مطالب الثورة... ومفيش جيش ولا شرطة هيقمع اي مظاهرات تحصل ضدهم ، هيقفوا على الحياد ويرفعوا ايدهم من الموضوع.

بالعكس بقى شفيق اللي اكيد هيرمي مطالب الثورة في الزبالة .. ولو حاولنا ننزل ضده في مظاهرات الجيش و الشرطة هيقمعوا المظاهرات دي بحجة الدفاع عن الشرعية وهم اصلا بيدافعوا عن مصالحهم و مكتسباتهم اللي خسروها بعد الثورة وبيحاولوا يعوضوها بمساندة شفيق في الحكم.

مرسي رجل مدني مش رجل دين .. مرسي مهندس مش دارس شريعة اسلامية .. معندوش كاريزما الزعيم الديني .. ولا حتى المرشد محمد بديع رجل دين (هو طبيب بيطري) .. يعني الخوف من الدولة الدينية غير قائم خصوصا ان التيار المدني في مصر قوي و خصوصا برضه ان الجيش و الشرطة مش هتتدخل في شغل الاخوان ولا هتساعدهم في تنفيذ اي مشاريع خاصة بفكرهم السياسي الاسلامي.. ده غير ان مصر فيها مؤسسة دينية عريقة و مستقلة الى حد ما وهي الازهر والاخوان مالهمش اي سلطان عليها .. تقلق من الدولة الدينية لو المفتي او شيخ الازهر هو اللي وصل للحكم  او هو الآمر الناهي في الحكم .. غير كده متقلقش .. مش الاخوان اللي هيخلوا مصر ايران او السعودية.

شفيق بالرغم من انه عسكري سابق و متقاعد الا انه بيقدم نفسه في الانتخابات باعتباره رجل عسكري (فريق) مش (دكتور) زي ما كان بيتقال عليه ايام مبارك .. ده مؤشر مهم انه مرشح الدولة العسكرية المستبدة اللي ورطت مصر وتسببت في تدهورها منذ قيام ثورة 52 الى الان .. دولة المصالح و الاصحاب و الشللية .. دولة الفساد واهل الثقة لا اهل الخبرة.

الاختيار بين مرسي و شفيق هو اختيار بين دولة مدنية و دولة عسكرية .. وليس اختيار بين دولة دينية و دولة مدنية كما يدعي اعلام الفلول و الحزب الوطني.

نجاح مرسي في الانتخابات هيقوي موقف الاخوان عشان هيكون في ايدهم السلطة التشريعية و السلطة التنفيذية لكنهم لا يمتلكون ادوات السلطة التنفيذية .. مش في ايديهم القضاء ولا الجيش و لا الشرطة بعكس شفيق اللي هيكون بمثابة الرأس التي تم سيعاد تثبيتها في جسد  اخطبوط الفساد الحزبوطني المستشري في كل اجهزة الدولة والذي يتمنى ان يعود الى سابق عهده و قوته.

نجاح مرسي هو نجاح للثورة ..نجاح الثورة انك تجيب شخص من خارج المنظومة التقليدية لتضعه على رأس الدولة .. مش انك تجيب رئيس وزراء مبارك لتضعه على رأسها .. فكرة التغيير لابد ان تنجح .. قطار التغيير لابد ان يكمل مسيرته كما قال البرادعي .. اذا انطلق قطار التغيير لن يستطيع ان يوقفه احد .. النهاردة اخوان بكرة ليبراليين بعده يساريين او سلفيين وهكذا.

مرسي لازم ينجح .. ولازم نحشد له بجد و ننزل ننتخبه .. المقاطعة مش هي الحل.